दिवस हे जाती कसे?

दिवस हे जाती कसे अन् ऋतु असे छळतात का?
विसरतो आहे तुला पण आसवे ढळतात का?

निसटुनी आयुष्‍य गेले त्‍या तुझ्या पदरांसवे...
पण मुक्‍या रक्‍तात सारे अर्थ मग जुळतात का?

जवळ तू नाहीस... उरली एकटी माझी मिठी
चुकुन तव निःश्‍वास गाली माझिया रुळतात का?

बिलगुनी बसली तुझी ही मधुरविव्‍हल चिंतने!
चांदण्‍या रात्री नकोशा टाळुनी टळतात का?

रोज वासंतिक तुझे मी शब्‍द... स्‍वर नाकारितो
अन् तुझी गीते तरीही मजकडे वळतात का?

मी कधी म्‍हटले, ''तुझी मज चरणचिन्‍हे भेटली!''
पण सुन्‍या डोळ्यांत माझ्या दशदिशा चळतात का?

कुंद ह्या वेळी तुझ्याविण प्राण बघ मंदावला...
मग असे भवती अचानक दीप हे जळतात का?

जर तुझा एकांत केव्‍हा गुणगुणाया लागला,
शोध तू ह्रदयात... माझी स्‍पंदने मिळतात का?

- सुरेश भट