ये

 ये
या जीवानं अंतर साहण्याची मर्यादा ओलांडावी
त्याआधी
तू ये

ये त्या रात्रीसारखी
जवळ बस
ठेव छातीवर हात
डोळ्यात डोळे गुंतव
हाताच्या स्पर्शातून, गहिऱ्या नजरेतून
तू उतर माझ्या आत, खोल
मी कणाकणाने साकारलेल्या जगात
जिथे आहेत तुझ्या आठवणींचे दिवे
तुझ्यासोबतच्या क्षणांचे इमले
मी चितारलेली तुझी असंख्य चित्रं
आणि वाळूत उमटलेली तुझी-माझी पावलं

तिथला सूर्योदयही तुझा
रात्रही तुझीच
चंद्र, सूर्य,
असले-नसलेले तारेही तुझे
आणि हे लहानसं जग उरात सांभाळत
तुझी वाट पाहणारा हा जीवही तुझाच आहे सखे
ये,
वाट पाहतोय