एका क्षणात

मी केव्हाचा जाऊन पोचलोय तिथं
तुझ्या येण्याची वाट पाहत
मनातली हुरहुर अन् अस्वस्थता
चेहऱ्यावर दिसू न देण्याचा प्रयत्न करत
मी उभा आहे...

तू माझ्याकडे चालत येताना
ह्रदयाची होणारी धडधड सावरत
तुला मिठीत घेतल्यानंतर
धावत्या काळाचे लगाम ओढत
मी तुझ्यासह तिथे उभा आहे...

तू भेटल्यानंतर होणाऱ्या संवादांची
निरनिराळी पारायणं सुरुयत माझी
तू कशी दिसशील, कशी हसशील
तुझी नजर, तुझा स्पर्श
हे सारं सारं अनुभवत
मी आहे तिथे
तुझ्याचसोबत

असा कालौघापासून सुटा होऊन
मी भटकत राहतो विखुरल्या क्षणांमध्ये
तुला शोधत, अनुभवत, ऐकत, स्पर्शत...
त्यातल्याच एका क्षणात
मी केव्हाचा जाऊन पोचलोय
तुझ्या येण्याची वाट पाहत...