मी प्रेम करतो तुझ्यावर!
तुझ्या-माझ्यातल्या दुराव्याची सगळी अंतर मापत...
तुझा आवाज ऐकताना उरात उमळलेली धडधड सावरत...
अंगभर उगवणारी थरथर पुन्हा त्याच मातीत रिचवत...
दिव्यावर झेपावणाऱ्या पाखराच्या आवेगाची तीव्रता पचवत...
तुजवीण संथावत चाललेल्या श्वासाला उसनं बळ देत...
जडशीळ छातीत सयगंधाला भरुन घेत...
या चेहऱ्यावर फुलणारं तुझं हसू डोळा भरुन घेत...
वर्तमानाच्या खडकाळ भुईत भविष्यातल्या समाधानाची बीजं पेरत...
तुझ्यासाठी उभ्या जगाला फाट्यावर मारण्याची जिगर जागवत...
तुझा हात धरण्याची अन् ती पकड निभावून नेण्याची धमक
स्वतःचीच स्वतःला अधोरेखित करत...
तुझ्यासाठी माझ्यातल्या स्त्री-पुरुषाची गुंतवण अधिक घट्ट करत...
अहिल्येची प्रतिक्षा अन् मीरेची ओढ यांतला तोल साधत...
मी प्रेम करतो तुझ्यावर...
No comments:
Post a Comment