रंग

तू इवल्या हातांनी उधळलेले रंग
आयुष्याच्या सांदीकोपऱ्यात जाऊन स्थिरावतायत
दररोज...
त्या रंगांना मोहक स्पर्श आहे
तुझ्या शब्दमोहाचा मधुर नाद आहे
लडिवाळपणाची गोडी आहे
आणि तुला नव्याने उमगू लागलेल्या रुसव्याची किनारदेखील!
ते रंग रुजत चाललेत आत खोलवर
आणि त्यातून मीच उगवतोय, रोज मोठा होतोय
बाप म्हणून...
इवल्या हातांनी, टपोऱ्या डोळ्यांनी आणि नाजूक ओठांतून बाहेर पडणाऱ्या "बाबा" या शब्दांनी केलेली ही रंगांची उधळण रोज अनुभवतोय, हे किती मोठं देणं आहे!
अशा वेळी ज्यावर विश्वास नाही, त्या देवाचेसुध्दा आभार मानावेसे वाटतात!